ئَزَمِة كِتابِة الهَمزِه
رموز الهمزه السِّتّه
الهمزه صوت من ئصوات لغّتنا، بسّ بالفصحى الفراهيدي، ئللّي عمل هالرّمز ’ء‘ للهمزه، ما عمل لئلها حرف مستقلّ بالكتابه متل ما باقي الحروف ئلها رموز.
وعلى الئرحج استَعْمَل هالرّمز ’ء‘ اللّي هو راس حرف العين، لئنّه الئَعاجم كانو وما زالو بيلفظو العين همزه. فحاول يميّز الهمزه عن العين بدون ما يعملهن رمزَين مختلفين.
المهمّ ئِنُّه بينما كلّ حرف ئِجْمالًا ئِلُه مِن شكلين متل ’ر‘ و’ـر‘، لَئَرْبَع ئَشكال متل ’جـ‘ و’ـجـ‘ و’ـج‘ و’ج‘، الهمزه ئِلها ئَكتر:
1- أ - متل بكلمات أمل ورأي؛ و ـأ - متل بكلمة سـأل،
2- إ - متل بكلمة إقبال،
3- آ - متل بكلمة آب، - ـآ متل بكلمة ضـآله،
4- ؤ - متل بكلمة رؤوف، ـؤ - متل بكلمة بـؤبـؤ،
5- ئـ - متل بكلمة وئام، ـئـ - متل بكلمة لئيم، ـئ - متل بكلمة لاجئ،
وللحقيقه هالئشكال الخمسه اللّي فوق مش هنّي المشكله!
المِشْكلِه الئساسيّه هيّي ئنّه قواعد كتابة الهمزه بالفصحى كتار، فمثلًا بكتاب ’جامع الدّروس العربيّة‘ للشّيخ مصطفى الغلاييني، تحقيق أحمد ابراهيم زهوة، ونشر دار الكتاب العربي، بيروت، سنة 2006 م، موضوع كتابة الهمزه بْيِبْدا بالصّفحه 275 وبْيِخْلَص صفحه 285 (عشر صفحات لدرس واحد).
ئَمّا بِكْتاب ’دليل توحيد ضوابط الرّسم الئِملائي للكتابة العربية‘، اللّي نشرُه سنة 2009 المركز العربي للبحوث التربويّة لدول الخليج، فَبْيِبْدا دَرْس كِتابِة الهَمْزِه صفحه 18 وبْيِنْتِهِي صفحه 44! (26 صفحه)
وهودي مَرْجِعَيْن حَدْيثِين وطبعًا مُعتَبَرِين. هَيْدي كَمِّيِّه هائِله مِن القَواعِد اللّي فِعْلِيًّا ما بِتْفيد بِشِي وممْكِن الكِلّ يِرْتاحو مِنها بِطِريقَه سَهْلِه جِدًّا.
- ئوّل مشكله بقواعد كتابة الهمزه بالفصحى هيّي قواعد اللّي بتحكم كونها همزه ملفوظه (قطع) ئو همزه مش ملفوظه؛ الهمزه اللي مش ملفوظه بيسمّوها همزة وصل.
- بالئسمائـ: بالفصحى في عشر ئسمائ بيبدو بهمزة وصل منهن كلمات اسم (مش إسم!) وابن (مش إبن) وابنة، وامرؤ، وامرأة، واثنان، واثنتان، وايمن والله! فهذا شي التّلميذ بدو يحفظه حفظ لئن ما في سبب ليش هالكلمات بتبدا بهمزات وصل بينما باقي الئسمائـ اللّي بتبدا بهمزه بتكون همزاتها قطع متل إنسان وأمل وأُمّة ...
12- مثنّيات هالكلمات كمان بتبدا بهمزات وصل مثل اسمان وابنان ...
13- بينما جمع كلّ كلمة منهن بتبدا بهمزة قطع متل كلطات أسامي وأبنائـ ...!!!!
14- كلمات ابن وابنة منحذف حتى همزة الوصل منهن لمن يكونو بين اسمين علمين مثل بـ حي بن يقظان - مش حيّ ابن يقظان!.
15- كمان همزات مصادر الفعل الخماسي والسداسي، مثل: اجتماع، اقتراح، استقلال، همزات وصل
16- (ال) التعريف دايمًا همزتها وصل، مثل: الـمدرسة، الـملعب.
17- بالئفعال: لمّن الفعل الخماسي ئو السداسي بيبدو بهمزه بتكون همزة وصل مثل: استقبل، استراح، احدودب، ...
بالئضافه للقواعد السبتعش (17) اللّي فوق، في كمان الجدول التّالي الشّامل والمتداوَل على الئنترنت لقواعد كتابة الهمزه. (للئسف هالجدول متداول لدرجه ئِنُّه تنعرف مصدره الئساسي لازم نعمل دراسه مخصّصه. فنحنا منعتذر من المئـلّف الئوّل اللي ما قدرت ئعرفُه لحتّى على الئقل ئذكرُه. الجدول بيحتوي شي ستّين قاعده بس ممكن اختصارهن:
جدول القواعد الحاليّه لكتابة الهمزه
القواعد بهالجدول ممكن اختصارهن لتنعش 12 قاعده اعتمادًا على محتويات المستطيلات التّلاته بكعب الجدول
هالتنعشر قاعده بالئضافه للسبتعشر قاعده اللي ذكرناهن قبل الجدول بيعملة ما مجموعه تسعه وعشرين (29) قاعده.
التعب المهدور والكلفه الباهظه
الوقت والجهد اللّي بِحطّوهن مِئات ئلوف الئَساتذه العرب كِلّ سنه لَيْعَلّْمو قواعد كتابة الهمزه للتّلاميذ، والكلفه الماليه المتئتيه عن هالعمل الكبير، والوَقْت والجهْد الكْبير اللّي بِيحِطّوه ملايين التّلاميذ لَيِتْعَلَّمو هَالْقَواعِد، والوقْت والجِهْد اللّي بْيِصِرْفوه ئلوف الكِتّاب لَيِتْئَكَّدو إِئّهُن كاتْبين الهمزات صَحّ بمقالاتهن، وكمان تاكلفه الماليه اللي بيتحمّلوها منشان هالئمر، هيدي كلّها ئَوقات وجْهود وكلفه ماليه بِمَجْموعها هائِله وجبّاره، بَسْ لَلْئَسَف كِلّها عَمَلِيًا ما ئِلْها ئَي لْزوم ئِلّا المُحافَظَة على مَصْلَحِة اللّي هَكْلانِين هَمّ يْحِطّو جِهد لَيْغَيّرو زَلِّه ارْتَكَبها ئَحَد عمالِقِة اللّغّة مِن ئَكْتَر مِن ئَلف سنه.
وبالرّغم من كلّ جهود تَعَلُّمْها وتعليمها، مِنْضَلّ نْشُوف ئَغْلاط بِكِتابِة الهَمْزِه بِكِلّ الئَماكِن وحَتَّى عِند الكْتِير مِن شُعَرا وكِتَّابِ وْئَساتْذِة الفصحى -وطبعًا لمّن النتيجه تكون هيك بتكون هالجهود اللي صرلهن معلّمين وتلاميذ العربي بيبذلوهن عشرات السنوات كتير منها راح هدر. كان كتير أجدى لو الهمزه كانت حرف عادي والوقت اللي انصرف عليها كان من الئجدر ينصرف على القرائه للفهم!
كتابة الهمزه مشكله لدرجة ئِنّه في شي ئسمُه "حْزازير كتابة الهمزه"! ئِنّه عال؛ القِصّه مُمْتِعَه. بسّ كميّة الهدر كبيره لدرجه ما بتسمح بتبرير الئِصْرار على ئْبقائـ نفس القواعد مِنْشان الحْزازير!
بعد الموضوع ما خلص: فبالئِضافه لكلّ اللّي قِلْناه فوق، الْقواعد اللّي حَطّوها اللّغَوِيّين لَكِتابة الهمزه، مِش مِنْسِجْمه مع كِتابتها بالمرجع الئساس للفصحى اللي هو القُرآن الكريم! وما لاقيت سبب مقنع لهالاختلاف!
الفرق بين قواعد كتابة الهمزه لدى اللغويين وفي القرآن الكريم
ئِذا مْنِرجع لَسورة الأعراف مَثَلًا، مِنْشوف بِالآيِه الرّابْعه بكِلْمة "قاىٟـلون" (sic) الهمزة مكتوبِه تحت النّبره (يِعْنِي تَحْت كِرْسِي الْيَا) مِشْ فَوْقها، عِلمًا ئِنُّه بالفصحى الحاليّه، ما في همزه بْتِنْكَتَب تَحْت النَّبره، وئِذا شي تلميذ جَرَّب وْكَتَبْها بْهالطّريقَه، بْتِنْحسبلُه طبعًا غلط، لَئَنُّه القاعده بالفصحى هيّي كِتابة الهمزه فوق النّبره؛ يعني هيك: قائلون! وبالآيه السّابعه بنفس السُّورَه، كمان الهمزه مكتوبه تحت النّبره بكلمة غاىٟبين، والهمزه تحت النّبره بغير آيات متل بكلمات يومىٟذ وللملٰىٟكة وغيرُن. بالآيه السّادسه الهمزة مكتوبه عالنّبره بكلمة ’لنسئلنّ‘، بينما بالفصحى بتنكتب على الئلف: لِنَسْأَلَنّ! بالآيه ستّه وعشرين كلمة آدم مكتوبه ئـادم، وبالآيه تماني وعشرين مكتوب ئـابائـنا بدل آبائـنا، وبالآيه تنين وتلاتين مكتوب ئـامنوا بدل آمنوا. كلّ هالئمثله من سوره وحده، بمعنى ئنه في كتير غيرهن بالقرآن الكريم!
هالتّضارُب بِطُرُق كتابة الهمزه بين القُرآن الكريم وبين القواعد اللّي بِتْعلِّمها المدارس، بِيضَعِّف حِجِّة المِتْشَدّدين الرّافْضين معالجة الئَمر لَمُجَرَّد ئِنْهُن مْعَوَّدين على طُرُق مْعَيَّنِه وْبْيِنْزِعْجو من التّغيّير.
هالمتْشدّدين لازم يِنْتِبْهو ئِنّهُن عم يرهقو التّلاميذ الزغار وبيهدرو وقت تربوي ثمين لمجرّد ئنّه ما بيحبوا التّغيير وبيستصعبوه شوي. التّغيير بهالقواعد رح يناسب راحة الكلّ ورح يفيد نمو اقتصاد البلد بسبب توفير الجهود المهدوره اللي ممكن تُستعمل لغير ئِنتاج.
الحلّ البديهي
الحلّ الئصحّ والئسهل ئِنُّه نعامل صوت الهمزه متل ما منعامل غير ئصوات، يعني نعطيها حرف مستقلّ وتصير متلها متل كلّ الحروف اللّي بتنكتب بئستعمال النّبره (كرسي) متل ال ـبـ، و ال ـتـ، و ال ـثـ، و ال ـنـ، و ال ـيـ.
يعني نصير نكتبها ئـ و ـــئـ على طول (وممكن نسمح ببداية الكلمه تنكتب عالألف لنخفّف من إشكالات ممكنه). ساعتها بتصير الهمزه متل باقي الحروف اللّي بتنوصل باللّي بعدها، يعني ئلها تلات شكال بس: أ وئـ وـئـ بدل قواعد الهمزه التسعه وعشرين.
هيدي ئمثله: ئِـنْسان، ئَـمَل، ئُـوعا (بمعنى انتبه)، ئَادَم بدل آدم؛ وسُـئَـال بدل سـؤال، مروئَه بدل مروئـه، تَـئَـنّـي بدل تـأنّـي، كَـئَـنّ بدل كأَن،
ولكن مش رح نغيّر كتابة الهمزه بالأسمائـ والكلمات الدينيّه.
متل ما حكينا في مشكله بتظهر لمّن نطبّق هالطريقه على كتابة الهمزه ببداية بعض الكلمات اللّي بْتِبْدا بِهَمزه، بسبب جواز ئِسقاط لفظ الهمزه بحالات همزة الوصل. لِمِّن الهمزه تكون مَلفوظه، يِعْني تْكون هَمْزِة قَطع، ما في مِشكله لئنه منكتبها عالنّبره متل بكلمات ئْصول والئَحْسَن. بس لمّن تكون مش ملفوظه متل بئَلِف-لام التّعريف، منكتبها ئلف صامته وبدون همزه عليها متل بالفصحى متل بكلمات البيت والاستعاره وغيرهن.
قاعدة كتابة الهمزه باللبنانيه
الهمزه باللبناني بتنكتب متل البا، بس بدل النقطه تحتها منحطّ همزه فوق النّبره.
.... و متل التا، بس بدل النقطتين منحطّ همزه فوق النّبره
ئمثلِه: ئِـمـتحـان وسُـئَـال ومَـسْـئَلـِه ولُـئـم وشْـئـون ومْـئَـثِّـر ويتئتِئـ ويِتْجَرَّئـ واسْتِيائـ ولِقائـ ...
بالنسبه لهمزة الوصل، يعني الهمزه المش ملفوظه، منكتبها باللِّبنانيّه متل ما بيكتبوها بالفصحى يعني ئلف بدون همزه متل كلمة اتّجاه ئو متل بكلمة الاستعاره. بس اللبناني ما منلتزم بكتابتها كهمزة وصل فمسموح نكتب ئِتِّجاه و ئِسْتِعاره!
هيك بتصير قاعدة الهمزه قاعده وحده بتشبه تمامًا قواعد كتابة البا والتّا والثّا والنون واليّا.
بيبقى الفرق لمن تكون الهمزه بئاخر الكلمه متل بكلمة لقائـ، فعلى لوحات المفاتيح مش موجود حرف الـ ئـ. منشان هيك منضطر نكتب لقائ ئحيانًا.
ملاحظه عن صعوبات تَبَنّي القاعْده لِـ جْديده
هيدي تجربه من التّجارب اللي بيكون الفرق بسهولة تبنّيها كتير كبير بين الئجيال.
الئجيال الئكبر سِنًّا رح بتميل لَمْقاوَمِة التّغيير (ومقاومة التّغيير من خصائص الطّبيعه). هَالْئَجيال الئَكبر هيدي، حَتَّى اللّي مِنْها بْيِقْتِنِع بهالتّغيير، رَح بِيلاقي شويّة صعوبه بالئوّل، لئَنُّه ئوتوماتيكيًّا رح يلاقي حالُه رجع للقواعد القديمه.
ئمّا الئَجيال اللّي رح تتعلّم القاعده الوِحدِه البسيطه من الئساس، وما رح تتعلّم القواعد القديمه، رح بتلاقي القاعده الجديده سهله جدّا ومَنْطِقيّه.
نحنا مْنِدْعي الكِلّ لَتَبَنّي هالقاعده الجديده لكتابة الهمزه حتّى بالفصحى، مش بس باللّبنانيّه لَتِسهيل هالئمر على الكلّ. ومْنِتْوَقّع ئِنُّه مع الزّمن، نْبَطّل نْشوف على الكيبوردات غير الهمزه العالكرسي ويتصمّملها شكل بئاخر الكلمه يكون جماليًا مقبول.
ئحد الاعتراضات اللي رح نسمعها هو (كيف رح يعرف القارئـ يحرّك الهمزه ئذا كانت بكلّ الئحوال مكتوبه عالكرسي؟!) هالئعتراض سببه ئنُّه لما نشوف الهمزه عالألف متل بكلمة ’سأل‘ دغري منعرف نقراها وكئنها عليها فتحه. بينما ئذا شفناها مكتوبه ‘سئل‘ مش رح تخطر الفتحه ببالنا، رح تخطر الكسره عالبال. ولمّن القارئـ يشوف كلمة ’أنا‘ مكتوبه ’ئنا‘ كيف بدّو يعرف ئنّه الهمزه بئول كلمة ئنا عليها فتحه؟!
بسّ ئصحاب هالئعتراضات مغلبطين كتير: عم ينسو شو عم يصير معهن بالحروف الباقيه كلّها!
مش منتبهين ئِنُّه الموضوع مجرّد عاده خاصّه بالهمزه عنْوِه عن كلّ الئصوات الباقيه وبدون ئي سبب منطقي.
بالواقع تمامًا بنفس الطّريقه اللّي بيعتمدوها ليحرّكو كلّ الحروف هنّي وعم يقرو، بيقدرو يحرّكوا الهمزه!
لازم يتذكّرو ئنهن بكلّ الئصوات الباقيه متل البا والتّا .والجيم ... والسّين ... واليا ما بيحتاج القارئـ يشوف الحرف على الئلف ليعرف ئنه عليه فتحه ولا بيحتاج يشوف الحرف على واو ليعرف ئنّه مضموم.
لنشرح حقيقة سخافة قاعدة كتابة الهمزه خلّينا نطبّقها على حروف السّين والجيم. فبحسب القواعد القديمه منكتب الهمزه على الئلف بكلمة ’أمل‘ بدل ئَمَل، فئذا طبقنا نفس هالقاعده على حرف الجيم بكامة جمل منصير نكتب اۚمَل بدل جَمَل، و عىۚيب بدل عجيب، ومعوۚون بدل معجون. وئذا طبقنا هالقاعده على حرف السين منصير لحتى القارئـ يعرف الحركه على السين نكتب ’ وۜمْعَه ‘ بدل ’ سُمعَه ‘ و نـىۜـيـب بدل نَسيب ... .
Comments
Post a Comment